प्रधानमन्त्री खनालको उपलब्धिहिन कार्यकाल

-राजन घिमिरे
शपथ ग्रहण गरेको ६ महिना ९ दिन पछि आईतवार राती राष्ट्रपति कार्यालयमा राष्ट्रपती रामवरण यादवलाई प्रधानमन्त्री झलनाथ खनालले राजीनामा बुझाएका छन् । उनले जुन रुपमा कार्यभार पुरा गर्ने उद्देश्यले प्रधानमन्त्री बनेका थिए त्यो कार्यभार पुरा नगरि प्रधानमन्त्री पदवाट राजीनामा गरेका हुन् । अव अर्को मन्त्रीमण्डल गठन नभएसम्मको लागि झलनाथ नेतृत्वको मन्त्रीपरिषदले कार्य संचालन गर्नेछ ।

प्रधानमन्त्री झलनाथ खनालको ६ महिनाको कार्यकाल केही उपलब्धि हासिल गर्न नसकि नै बित्यो । माओवादीको समर्थनमा प्रधानमन्त्री बनेका झलनाथ खनालले प्रधानमन्त्रीहरुको फोटोमा अर्को एउटा फोटो थप्ने भन्दा केहि उपलब्धिपूर्ण काम गर्न सकेनन् । उनको कार्यकालमा राष्ट्रिय तथा अन्तर्राष्ट्रिय स्तरमा महत्व राख्ने कुनै खास काम भएन । आफ्नै पार्टी र विपक्षी पार्टीहरुवाट आलोचना खेप्दै आएका प्रधानमन्त्री खनालले केही समयअघि माओवादी र मधेशी जनअधिकार फोरमका केही मन्त्रीलाई सफतग्रहण गराएपछि त उनलाई पार्टीमा कारवाही गर्ने चर्चा नै चल्यो । उनले यो आलोचना खेप्न नसकि प्रधानमन्त्रीबाट राजीनामा दिएपछि आफ्नो पार्टीको बैठकमा उपस्थित हुने समेत निर्णय समेत गरे र अन्त्यमा आफूलाई समर्थन गरेको माओवादीले नै पूर्ण रुपमा सहयोग नगर्नु पनि खनालको राजीनामाको अर्को कारण रहन गएको विश्लेषकहरु बताउँछन् । खनाल आफ्नै पार्टीका वरिष्ठ नेता माधव कुमार नेपालको बहिरगमनपछि प्रधानमन्त्री बनेका थिए । माधवकुमार नेपाल प्रधानमन्त्री रहदाँ खनाल पक्षले सहयोग नगरेको र उनको राजीनामा माग्ने काम एमालेबाटै भएकाले पनि अहिले नेपाल-ओली पक्षले खनाललाई सहयोग नगरेको हुनसक्ने राजनीतिज्ञहरुले बताउने गरेका छन् । उनले अन्त्यमा भने पाँच बुदे सहमतिको कार्यान्वय गरेर सहमतिको कार्यान्वयन गरेका छन् । त्यसैले उनको कार्यकाल आफ्नै लागि र समग्र देशका लागि त्यति खुःखद भने हुन सकेन ।